Proserpinae fabula ab antiquitate romana ad aetatem renatarum artium
Scholae per rete in theatro Zoomico agitandae, a die 17 m. Maii ad diem 28 m. Iunii a. 2023
Satis constat Erebi reginae fabulam ab antiquitate ad nostram usque aetatem ferme sine intermissione poetas, pictores sculptoresque legisse atque imitatos esse.
Harum scholarum auditores non solum quomodo Homeri Hymnus In Cererem ab oblivione saeculo XVIII sit vindicatus discent, verum etiam aliquot locos notissimos eosdemque egregios cum ex Ovidii Metamorphoseon necnon Fastorum libris tum ex Claudiani opere, quod De raptu Proserpinae inscribitur, depromptos una cum praeceptore legent atque exponent. In altera vero scholarum parte admirabimur hinc saeculis XIV et XV homines doctos studiis ardentes diligenter de fabula Proserpinae inquirere atque allegorice interpretari, illinc aetate a litteris renatis nuncupata lacum Hennaeum Pergum, in cuius pratis flores legens virgo a Plutone Inferorum rege rapta esse perhibetur, explorari et describi.
In hisce scholis egregia cum pictorum (Rubens, Veronese, Peruzzi, Tintoretto, Pietro da Cortona, Rembrandt) tum sculptorum (Bernini, Girardon, Power) monumenta illustrabuntur.
Scholae per rete in theatro Zoomico die Mercurii horis 17:00-19:00, secundum horologiorum rationem quae sunt Romae, Latine agitabuntur.
Pelliculae uniuscuiusque scholae usque ad Kalendas Septembres prostabunt.
Scholarum ordo
| Quando | Argumentum |
| I. Mer. d. 17 m. Maii, h. 17:00-19:00 CET | Scholarum argumentum conspectumque exponemus
Homeri Hymnus In Cererem Proserpinae fabula apud Ciceronem |
| II. Mer. d. 24 m. Maii, h. 17:00-19:00 CET | Proserpina in Ovidii Metamorphoseon libro V (pars I) |
| III. Mer. d. 31 m. Maii, h. 17:00-19:00 CET | Proserpina in Ovidii Metamorphoseon libro V (pars II)
Proserpina in Ovidii Fastis |
| IV. Mer. d. 7 m. Iunii, h. 17:00-19:00 CET | Claudiani De raptu Proserpinae (pars I) |
| V. Mer. d. 14 m. Iunii, h. 17:00-19:00 CET | Claudiani De raptu Proserpinae (pars II) |
| VI. Mer. d. 21 m. Iunii, h. 17:00-19:00 CEST | Allegoriae de Proserpinae fabula (saec. XIII-XIV) |
| VII. Mer. d. 28 m. Iunii, h. 17:00-19:00 CEST |
Proserpina rediviva (saec. XV-XVII)
|
Nomen licet dare intra diem 16 mensis Maii a. 2023
