Thalia 2024

Ludi scaenici omnium gentium

LVDI SECVNDI

METAMORPHOSES

In aedibus Universitatis Vilnensis,
a die 4 ad diem 11 m. Augusti a. 2024

Lituania, terra carminum veterumque fabularum plena… Opera ac benevolentia deorum dixerim fieri, sicui contingat litterarum disciplinam in eiusmodi urbe percipere, qualis est Vilna, loco mirabili hercle et inusitato, in quo artes Italicae genusque struendi baroccum videntur in hyperboreorum silvas translata, ubi antiquarum rerum memoria ex unoquoque lapide spirat.

Cz. Milosz

Thalia (Theatri Artisque Ludicrae Iuges Agones) conventus est ad quem convocantur homines docti studiosique rerum theatralium litterarumque Latinarum. In hoc conventu et fabulae scaenicae agentur et scholae explicabuntur. Prima enim Thalia optimo eventu summoque omnium gentium concursu celebrata, nobis visum est hos ludos rursus edere Vilnae, in urbe splendidissima, opere barocco atque antiquo artificio aedificata, inde a media aetate communis diversarum nationum sedes ac plurium quasi religionum sermonumque receptaculum. Omnia spectacula et scholae Thaliae 2024 habebuntur in aedibus Universitatis Studiorum Vilnensis, quae a saeculo XVI una ex praestantissimis rerum litterarum sedibus totius Rei Publicae Utriusque Nationis exstitit.

Animum attende, sodalis, sive spectator ad nos venies, sive magister, sive histrio aut pantomimius: Thalia in duas partes dividitur, quarum altera Certamen, altera Scholae nominatur

Scholas appellamus acroaseon auditionumque seriem in qua de antiquitatibus Graecis et Romanis disputabitur, necnon de arte ludicra, de comoediis tragoediisque quae Media Aetate et tempore Artium Renascentium Latine exaratae sunt. Acroases Latine et Graece recitabuntur cum ab ipsis Scholae Humanisticae moderatoribus, tum etiam ab aliis egregiis magistris et philologis, in quibus numerantur nonnulli ex clarissimis litteratis qui antiquitatum rerumque Latinarum disciplinam in Europa profitentur. Praeterea per eos dies visemus ornatissimum urbis Vilnae sinum, necnon museum Athenaei Vilnensis et arcem Tracensem. Certamen autem appellamus agonem scaenicum in quo Corona Aurea petitur: haec autem eis dabitur, qui praestantissimam fabulam Latinam vel Graecam docuisse videbuntur.

Programma seu ordo rerum agendarum (cum auditoriis indicatis!) depromi potest HIC.

PRAEMIA

Arbitri Delecti a Scholae Humanisticae moderatoribus, ut fabulas gregum existimarent, qui in certamen II nomine THALIAE nuncupatum ab ipsis indictum descenderant, ac praemiis pro cuiusque meritis ornarent, in theatro Athenei Vilnensis rite congregati sic praemia tribuenda esse censuerunt:

• Pileum Aureum histrioni qui in Palaemone scribae partem egit;
• Personam Auream histriae quae in Agave primas egit;
• Calamum Aureum poetae quia versus Agaves composuit;
• Coronam Aeneam gregi qui fabellam egit de Vetulis;
• Coronam Argenteam gregi qui fabulam de Palaemone egit;
• Coronam Auream gregi qui dedit fabulam cui titulus Dira lux sed lux.

Programma

Quando
Die Solis 4 m. Aug. 2024	Adventus participum in deversoria
Die Lunae 5 m. Aug. 2024:	(h. 9:30-10:00) Receptio participum (h. 10:00-11:00) Orationes aditiales (h. 11:30-13:00) Karolis Lyvens (University of Manchester), Latinitas hodie colenda: fata eius et vita (h. 15:00-17:00) Lustratio Studiorum Universitatis (h. 17:00-18:00) Certamen Sarbievianum
die Martis 6 m. Aug. 2024	(h. 9:30-11:00) Paolo Pezzuolo (Schola Humanistica), Lituania Latina (h. 11:30-13:00) Giuseppe Marcellino, Latinitas demortua (h. 15:00-16:30) Ranae. Pellicula lingua Graeca confecta spectabitur (h. 16:30-19:00) Lustratio urbis
Die Mercurii 7 m. Aug. 2024	Scholae parallelae (h. 9:30-11:00) Cecilie Koch (LVPA), Fabulam scaenicam scribamus (h. 9:30-11:00) Roberto Carfagni (Schola Latina), Amicorum colloquia absentium (pars prior) *** (h. 11:30-13:00) Dalia Andziulyte (University of Vilnius/LVPA), Spectacula apud Iudaeos antiquos (h. 15:00-20:00) Lustratio Arcis Tracensis
Die Iovis 8 m. Aug. 2024	Scholae parallelae (h. 9:30-11:00) Roberto Carfagni (Schola Latina), Amicorum colloquia absentium (pars altera) (h. 9:30-11:00) Rogelio Toledo (Rogerus Byzantinus) Ὀβίδιος ἐν Βυζαντίῳ Scholae parallelae (h. 11:30-13:00) Thomas von Stieglitz, De arte senarios bene pulchreque recitandi (h. 11:30-13:00) Luisa Bagiotti, Certamen de inferis metamorphosibus *** (h. 15:00-16:30) Roberto Carfagni (Schola Latina), Mors et vita: de titulis funebribus (saec. I-III p. Chr. n.) (h. 17:00-20:00) Spectacula Latina: Dira lux sed lux (Schola Nova, Incourt, Belgium) Palæmon apud Hyperboreos (Klasikų Asociacija, Vilnius, Lithuania)
Die Veneris 9 m. Aug. 2024	(h. 9:30-11:00) Giuseppe Marcellino, Roma aeterna (h. 11:30-13:00) Joel Derfner (New York University), Tu si hic sis: poetas agamus Scholae parallelae (15:00-16:30) Giancarlo Rossi (Academia Latinitati Fovendae), Erasmus ad usum posteritatis (15:00-16:30) Rogelio Toledo (Rogerus Byzantinus) Περὶ τοῦ θεάτρου τῶν πάλαι κατὰ τοὺς ὕστερον (17:00-20:00) Spectacula Latina Fabellae vetuli vetulaeque (MB Švaros burbulas, Vilnius) Agaue (Katolophyromai, Heidelberg/Latina)
die Saturni 10 m. Aug. 2024	(h. 9:30-11:00) Paolo Pezzuolo (Schola Humanistica), Περὶ τῶν παλαιῶν προσώπων (h. 11:30-13:00) Colloquium de ratione docendi et discendi (h. 16:00) Praemiorum collatio (h. 17:00) Dolor dulcis: Concentus symphoniacorum q.n. “Canto Fiorito” (h. 18:00) Promulsis
Die Solis 11 m. Aug. 2024	Profectio participum

Universitas Studiorum Vilnensis

Arx Tracensis

Universitatis Vilnensis

Theatrum

Via Arcis

Auditores

Discipuli, magistri, omnes qui sive studiorum sive animi causa locos exquisitiores litterarum Latinarum legere atque in notitia sermonis Latini proficere cupiunt.

Ubi

Vilnae, in aedibus Universitatis Studiorum (Universiteto gatvė 3). Inspice tabulam geographicam

Lingua

Latina

Quibus condicionibus

Ut scholis Latinis intersis, oportet eatenus linguam Latinam noscas, ut scholas ea lingua recitata aliqua saltem ex parte intellegere possis.

Testimonium

Peractis scholis, si id postualveris, testimonium accipies.

Pretium

230 € solventibus intra diem 15 m. Iunii, 290 € idem facientibus post eam diem. Haec summa complectitur et minervalia et pretia itinerum lustrationumque.