Ludi scaenici omnium gentium
LVDI TERTII
MARE SOMNIORVM
ΟΝΕΙΡΑΤΩΝ ΠΕΛΑΓΟΣ
Bracarae (vulgo Braga), a die 1 ad diem 8 m. Augusti a. 2026
THALIAM (Theatri Artisque Ludicrae Iuges Agones) nominamus omnium gentium ludos scaenicos novis fabulis Latinis Graecisque constitutos, qui Vicetiae (a. MMXXII) et Vilnae (a. MMXXIV) summo spectatorum concursu concelebrati nunc demum Bracarae Augustae referuntur, in urbe antiquissimae memoriae, ubi adhuc ostenduntur monumenta Gallaecorum, Romanorum, Arabum, Lusitanorum, ad summam omnium gentium quae saeculorum processu haec loca tenuerunt.
Per agonem duodecim fabulae agentur: octo Latinae, quattuor Graecae, omnes de uno eodemque argumento, quod est Mare somniorum (Ὀνειράτων πέλαγος). Actorum catervae, quae Bracaram ex diversis terris confluent (ex Belgio, Germania, Gallia, Italia, Lituania, Polonia, Civitatibus Foederatis), certabunt cum de aliis praemiis, quibus singulae scribendi agendique virtutes agnoscentur, tum maxime de Corona Aurea deque Χρυσῷ στεφάνῳ, quibus laus continetur omnium consummatissima: hoc enim optima fabula Graeca, illo praestantissimum spectaculum Latinum ornabitur. Intellectui eorum, qui Latine Graeceque minus intellegunt, interpretationibus Lusitanicis Anglicisve consuletur: hae enim per spectacula in albis proiectae apparebunt. Omnia spectacula edentur in splendidissimo Theatro Circo Bracarensi.
Ceterum, cottidie tempore matutino scholae utraque lingua agitabuntur de variis locis litterarum cum Latinarum tum Graecarum, in quibus et artem ludicram antiquorum indagabimus et aliquid luminis argumento certaminis afferemus.
Praemia conferentur die 8 m. Augusti vesperi.
FABULAE
Fabulae agentur a die 2 ad diem 8 m. Augusti. Praemia conferentur die 8 m. Augusti vesperi.
- Fabula aditialis de comoediis Aristophanicis.
Ἐναγώνια δράματα (litterarum ordine disposita)
- Adelphae, caterva “Societas Latina” (CFAS), LAT
- Ἑαυτὸν τιμωρούμενος, caterva “Μοῦσα μοι ἔννεπε” (Lituania) GR
- Fur amor, caterva “Theatrum classicum vilnense” (Lituania), LAT
- Luciolus sive progressus curiosi, caterva “Laelius d.a.”(CFAS- Italia), LAT
- Λωτὸς κατὰ κύματα, caterva “Olive a parte” (Italia), GR
- Ὄναρ Ἰωνᾶ, caterva “Θεομανεῖς Χῆνες” (Polonia) GR
- Palinurus, caterva “Palinuridae” (Belgio), LAT
- Phaedra, caterva “Κατολοφύρομαι” (Italia), LAT
- Somnium Emmae, caterva S.I.A.C. (Italia-Francia), LAT
- Somnium Metellae, caterva “Ad Hoc” (Polonia-Germania), LAT
- Somnii Portae, caterva “CLIO in fabula” (Francia), LAT
- Τέλος δὲ ἀποθνῄσκουσιν, caterva Ψευδοχορός (Belgio) GR
Quando quaeque fabula agatur, et in utra parte theatri et quibus fabris artificibusque, constituetur ex necessitatibus tum theatri ipsius, tum uniuscuiusque catervae.
SCHOLAE
Scholis, quae cottidie agitabuntur tempore matutino, aggrediemur illustrare cum antiquorum artes ludicras, tum etiam tertiae Thaliae argumentum, quod est Mare somniorum.
LUSTRATIONES
Tesseris auditorum continentur, praeter minerval et lucar, etiam pretium lustrationum, quibus visemus et sinum urbis Bracarensis et Ascensum Boni Iesu, in qua cum alia faciemus, tum etiam multos titulos Latinos examinabimus.
Index tam scholarum quam fabularum propediem proscribetur.
Ascensus Boni Iesu
Templum maximum Bracarense
Aedes mexicanae
