Vitae Lullianae aenigmata
Scholae de litteris Latinis deque arte Latine scribendi, Barcinone, a die 14 ad 16 m. Aprilis a. 2025
Ego fui stultus a principio meorum dierum usque ad triginta annos praeteritos, quando incepit in me recordatio Tuae sapientiae et desiderium Tuae laudis et memoria Tuae passionis. Unde, sicut sol habet maiorem vim in meridie, ita ego fui stultus et sine sapientia usque ad media aetatem.
Liber contemplationis, cap. LXX, 22-23.
Raimundus Lullus totam fere adulescentiam Maioricae traduxit inter convivia, amores et omnia voluptatum genera. Nocte quadam, cum iam recessisset stilumque arripuisset ut pulchritudinem puellae carmine prosequeretur, viso admonitus intellexit suam vitam tum denique fructum laturam, si tota Christo dederetur. Ex eo Lullus peregrinatus est non solum per plura regna pluresque gentes, sed etiam per cogitationes sapientium et theologorum decreta et animi humani recessus, ad hos tres fines perpetuo tendens: ut librum “omnium praestantissimum” conscriberet, deinde ut Arabes ad religionem christianam pertraheret, ut postremo monasteria per Europam conderet ubi adulescentes possent linguas asiaticas noscere. Ista ut assequeretur, decem solidos annos consumpsit cum in disciplina linguae arabicae, tum etiam in Agarenorum religione pernoscenda; tum alios decem constituit meditationi et contemplationi rerum divinarum, tum demum omnem operam ad verbum Christi per orbem propagandum trastulit: inde innumera itinera, quibus Lutetia Parisiorum ad Montem Pessulanum delatus est, inde vero Romam et Thunos, et inde Neapolin et Barcinonem, ac tandem Maioricam et in Cyprum. Hinc innumeri labores ei obiecti, sicut cum parum afuit quin ab Arabe occideretur, vel sospes a naufragio evasit. Pervenit praeterea in notitiam trium pontificum, vocatus est in ius magiae, bis in carcerem est coniectus.
In hoc conventu, qui Barcinone a die 14 ad 16 m. Aprilis 2025 celebrabitur, Schola Humanistica et Museum Hespericum manu vos ducent per vitam et res gestas huius praeclari doctoris Catalauni, qui sine dubio unus e principibus philosophiae Europaeae exstitit. Legemus enim suavissimum quemque locum Vitae Coaetaneae, quae a Lullo ipso dictata esse fertur, cum Lutetiae in Certosa Vallis Viridis commoraretur. Alia vero attingermus per Acta B. Raymundi Lulli, quo libro Ioannes Baptista Sollerius ex Societate Iesu oratione cum eleganti, tum etiam copiosa, ut par est in scriptore Latino saeculi XVIII, Raimundi vitam est persecutus. Ista omnia faciemus ad manum habentes imagines Breviculi, quae vitae Lullianae locos, quales enarratae sunt ab ipsius discipulo Thoma Le Myésier, summo artificio et incredibili argutia nobis prae oculos ponunt. Exercitationes porro Latine scribendi auditores adiuvabunt non solum ad ea, quae legerint, memoriae et animo insculpenda, sed etiam ad altius intellegendum quid aureum et laudatissimum Latinitatis genere ab infimo et mediaevali differat. Obibimus deinde ipsam urbem, lustraturi cum vicum hebraicum, tum etiam aedes regum Catalaunorum, ubi Lullus fertus in colloquium venisse cum Iacobo II Aragonensi.
Exspectati venietis Barcinonem, in unam ex patriis, ut ita dicamus, Raimundi Lulli: una enim cognoscmeus hunc praeclarum doctorem, qui maximum momentum habuit ad historiam et philosophiam europaeam conformandam.
Nomen dare licet usque
ad diem 5 m. Aprilis.
Accipiemus summum 20 participes.
Rerum index
Quando | Argumentum |
d. 14 m. Aprilis | 9:30-11:00 asotus Deum cognoscit
11:30-13:00 Caedis conamen 15:00-16:30 Iter Thunitanum 17:00-18:30 Pelagi pericula |
d. 15 m. Aprilis | 9:30-11:00 Ad Mare Nostrum
11:30-13:00 In aula regis 15:00-18:30 Vici Hebraici et Regiae Catalaunicae lustratio |
die 16 m. Aprilis | 9:30-11:00 De senectute Raimundi
11:30-13:00 Iudicium de magia |