Romae aeternae imago a poetis cum antiquis tum recentioribus expressa
Scholae per rete in theatro Zoomico agitandae, a die 18 m. Octobris ad diem 13 m. Decembris a. 2024
Iam inde ab antiquitate ad nostrum usque aevum Urbs, omnium aliarum regina, sine intermissione laudibus cumulata carminibusque celebrata est. Eminentem enim aeternae urbis effigiem, a sescentis ferme poetis spatio circiter trium et viginti saeculorum expressam et expolitam, nunc omnes uno ore extollimus atque admiramur. Haud enim pauci carminum conditores Urbis formam, Romanorum religionem, rei publicae administrationem, militiae disciplinam, mores, instituta antiquitus canere; neque vero mediae aetatis auctores Romam Christianam eiusque parietinas, urbis fortunā percussae et prostratae miseriti, minore mentis incitatione quam maiores versibus lustrare. Tempore denique Artium Renascentium permulti antiquitatis instauratores, egregia virtutis Romanae monumenta e scriptis antiquorum eruentes, novam instauratae eiusdemque triumphantis Romae imaginem fingere aequalibusque suis imitandam praebere. Hisce in scholis qualis fuerit Roma quantique momenti apud Latinos omnis aevi poetas habita sit, ostendetur atque illustrabitur.
Scholae per rete in theatro Zoomico die Veneris horis 18:30-19:30, secundum horologiorum rationem quae sunt Romae, Latine habebuntur. Pelliculae uniuscuiusque scholae usque ad Kalendas Februarias a. 2025 prostabunt.
Scholarum ordo
| Quando | I. De suavissima Romae imagine carminibus Latinis antiquitus expressa |
| I. Veneris d. 18 m. Octobris, h. 18:30-19:30 CET | Scholarum argumentum conspectumque exponemus
Aeternae urbis cunabula (Ennius, Ovidius) |
| II. Veneris d. 25 m. Octobris, h. 18:30-19:30 CET | Simplicitas Romanorum (Tibullus, Ovidius, Grattius Faliscus) |
| III. Veneris d. 8 m. Novembris, h. 18:30-19:30 CET | Excellentia Urbis (Horatius) |
| IV. Veneris d. 15 m. Novembris, h. 18:30-19:30 CET | Desiderio teneri Urbis (Ovidius; inscriptiones Latinae) |
| II. De urbis idolo a poetis serioris Latinitatis, mediaevalibus necnos Aetatis Renascentis expresso | |
| V. Veneris d. 22 m. Novembris, h. 18:30-19:30 CET | Martyres Romani (Ambrosius, Prudentius) |
| VI. Veneris d. 29 m. Novembris, h. 18:30-19:30 CET | Roma versibus Hildeberti celebrata |
| VII. Veneris d. 6 m. Decembris, h. 18:30-19:30 CET | Romae simulacrum in Carminibus Buranis |
| VIII. Veneris d. 13 m. Decembris h. 18:30-19:30 CET |
Romae Renascentis simulamen (Petrarca, Eneas Silvius Piccolomini, Cristophorus Landinus, Iacobus Sannazarus, Erasmus)
|
Nomen licet dare intra diem 15 m. Octobris a. 2024
