Scholae et colloquia Latina
Zoom, a Kal. Sept. ad Kal. Nov. a. 2021
Divinatio, hoc est rerum futurarum praesensio, sive ea in extorum volatuumque observatione erat posita, sive per divinum instinctum excessumque mentis fiebat, sive denique somniis prodigiisque interpretandis explicabatur, diu viguit apud multas et antiquas nationes, adeo ut non parvum momentum habuerit in pluribus locis rerum cum Asiaticarum, tum etiam Graecarum et Romanarum. Saepe dirarum obnuntiatio vel tristia signa in sacrorum visceribus reperta vel etiam sinister aquilae volatus obstitit quominus reges aut imperatores fluvium transgrederentur copiasque in hostium fines deducerent; non raro sacerdotis responsum causa immanium caedium exstitit, cum deorum ira innocentium supplicio placari posse crederetur; multi principes, a mathematicis magisque admoniti, in eos cives, a quibus insidias timerent, crudelissime saeviverunt.
Per saecula philosphi ex ornatissima quaque disciplina de divinationis natura altercati sunt totisque voluminibus de eius fide et auctoritate disputaverunt: Stoici enim et divinationem in hominibus versari et eam indicem voluntatis divinae esse contendebant; eandem Epicurei repudiabant tamquam inanem superstitionisque plenam; Academici denique et Peripatetici de oraculis alii aliter disputabant, dum plerique assensionem a re tam incerta cohibere malunt. Licet igitur divinationi aliqua veritatis particula insit, licet nihil nobis praestet praeter nugas fabulasque aniles, nemo profecto negabit hanc disciplinam, quae in multa genera tribuitur, quae multas imagines multa signa dira et formidabilia complectitur, aliquid tamen contulisse ad sollicitudinem tollendam angoremque dissipandum quem homines ex fati ignoratione concipere solemus.
In hac scholarum serie, quae tota Latine explicabitur, opera evolvemus de variis divinationis generibus conscripta, multa percepturi de auspiciis, de haruspicina, de ominibus, de astrologia, de somniorum interpretatione deque oraculis divino afflatu editis. Etenim praeter libros, quos Cicero de Fato et de Divinatione composuit, considerationem convertemus ad alios scriptores cum antiquos tum recentiores qui in perscrutanda divinationis natura versati sunt, ad Manilium videlicet, ad Plinium maiorem, Apuleium, Marsilium Ficinum, Picum Mirandulanum. Si nomen dederis, duos menses (i.e. a Kalendis Septembribus ad Kalendas Novembres) aditum habebis ad quinque pelliculas, singulas singulis horis inclusas, in quibus nos de horum scriptorum operibus disputantes audies. Accipies insuper libellum continentem omnes locos, quos praelecturi sumus.
Ad hoc, quo tota res iucundior sit, ter in sermonem nos dabimus, collocuturi videlicet inter nos et de rebus propositis disceptaturi. Sic enim, ut est proverbium, duos parietes de una fidelia dealbabitis: poteritis videlicet et vos in usu linguae Latinae exercere et nova amicitiae iura cum magistro sodalibusque coniungere.
COLLOQUIA
| Data | Argomento |
|
Die Mercurii 1 m. Sept., 2021 17:00-18:15 CEST
|
De excessu mentis |
| Die Mercurii 22 m. Sept., 2021 17:00-18:15 CEST | De somniis |
| Die Mercurii 13 m. Sept., 2021 17:00-18:15 CEST | De horoscopis |
SCHOLAE
| Video | Topic |
| Schola prima | Vetus Etruscorum sapientia |
| Schola altera | “Omen accipio” |
| Schola tertia | Praesagia nocturna |
| Schola quarta | Duodecim signa natalicia |
| Schola quinta | Bella, auguria, urbium natales |
Nomen dare licet usque ad pridie Kal. Sept.
(ad diem 31 m. Augusti)
